कठीण आहे

जगणे कठीण आहे मरणे कठीण आहे
त्याहून फार गझला करणे कठीण आहे

जलथेंब पावसाचे मी ओंजळीत घेतो
तलवार पण विजेची धरणे कठीण आहे

विझल्यावरी निखारे राखेत स्तब्ध होती
तारूण्य संपले की तरणे कठीण आहे

आभाळ चांदण्यांचे आहे किती शहाणे
ते संपले तरीही सरणे कठीण आहे

रक्तात माणसाच्या भरले विकार नाना
वाणीमधून अमृत झरणे कठीण आहे

सानिध्य यातनांचे इतुके मला मिळाले
आता कुण्या तनाला वरणे कठीण आहे

- राजीव मासरूळकर