हे पक्ष्यांनो

हे पक्ष्यांनो...

जगण्यासाठी मिळालेत पर, हे पक्ष्यांनो
कुणी बांधले नभात छप्पर, हे पक्ष्यांनो

शेतक-याला कष्टाचे लाभू द्या दाणे
किडे, अळ्यांनी भरले वावर, हे पक्षांनो

जे दिसते ते तसेच नसते, पारखून घ्या
वरून दिसते हिरवे गाजर, हे पक्ष्यांनो

आसपासच्या झ-यात असते जिवंत पाणी
कशास फिरता शोधित सागर, हे पक्ष्यांनो

कु-हाड, वणवा, अतिवृष्टी, दुष्काळ सोसता
कुठे लपविता नयनी पाझर, हे पक्ष्यांनो

जात नव्हे, हे पंखच तुमचे पक्के लक्षण
तुम्हा न लागो मानवी नजर, हे पक्ष्यांनो

~ राजीव मासरूळकर
   दि.8/12/2016
   रात्री 11:35 वाजता