उगव ना आज थोडासा उशीरा यार चंद्रा

उगव ना आज थोडासा उशीरा, यार चंद्रा
निशेचा पूर्ण होऊ दे जरा शृंगार, चंद्रा

धरेवर जन्म, मृत्यू, मोह, माया, सर्व आहे
कशासाठी फिरत आहेस गोलाकार चंद्रा?

जिच्यावर प्रेम तू करतोस ती सूर्यास ध्याते
तिला बहुतेक जडला मानवी आजार, चंद्रा!

तुझ्या मातीस साधा माणसाने स्पर्श केला
किती डोळे तुझे झालेत पाणीदार, चंद्रा!

युगांपासून नुसते स्वप्न तू बघतोस, राजा
कधी होणार आहे सांग हिरवागार, चंद्रा?

~ राजीव मासरूळकर