माझी कविता

माझी कविता

मला तोडते मला जोडते माझी कविता
विषात अमृत गोड गोड ते, माझी कविता

नभात दाटुन येता खोटी ढगाळ गर्दी
पाऊसवेड्या सरी सोडते माझी कविता

आयुष्याला चढवळणांचा येतो थकवा
चैतन्याचा झरा फोडते माझी कविता!

नियम, निकष, बेड्यांत भावना व्यक्त न होती
अशात संकेतांस मोडते माझी कविता!

हातावर हळूवार भावना उमलुन येती
तळहातीचे जणू फोड ते.... माझी कविता!

मनावरी अधिराज्य कुणी गाजवले आहे?
मनातला मळ  तरी खोडते माझी कविता!

~ राजीव मासरूळकर
11.4.2012    19:00
Edited 11.4.2017 12:15 pm