मी उन्हाचे चित्र कायम सावलीवर काढतो

दाबतो वाईट खाली चांगली वर काढतो
जन्म अख्खा जन्म एखाद्या सलीवर काढतो

शांततेमध्ये असे सौंदर्य विश्वाचे खरे
ज्यास धरणीकंप प्रिय, तो दंगली वर काढतो

सांग विश्वासार्ह मानावे उजेडाला कसे
आतले काळेच जर तो गोखलीवर काढतो

ज्यास कळते या जगाची साळसुद फसवेगिरी
पीक जन्माचे उभ्या तो दलदलीवर काढतो

रोग दुनियेचा मलाही लागला आहे जणू
मी उन्हाचे चित्र कायम सावलीवर काढतो

- राजीव मासरूळकर
  दि.१९ जुलै, २०२०