सणासुदी आला
काळतोंड्या पाण्या
कोंब दाण्या दाण्या
फोडलेस
तुझी आय अशी
अवेळी का व्याली
पिके वाया गेली
हातातली
दलिंद्र्यावाणाच्या
पेरणीच्या वेळी
कशी तू बखाडी
पाडतोस
गेल्या साली मेल्या
आला इतकुसा
जीव कसाबसा
वाचविला
आणि यंदा किती
बरसतो बापा
बंद कर खेपा
गयभान्या
बारा बापाचा तू
कितव्या बापाने
भिजवले दाणे
सांग तुझ्या
येड्याच्या बजारा
केला सत्यानास
किती गळफास
हवे तुला
अती केल्यावर
होतोस नकोसा
जाई ना तू कसा
सुक्काळीच्या
अक्कलीच्या कांद्या
कळे ना का तुला
घामातून आला
आहे तू ही
~ राजीव मासरूळकर
दिवाळी 27/10/19
दु. 3:30 वा
No comments:
Post a Comment