प्रत्यंतर

 आपल्यामधे कितीक आहे अंतर शोधू

आपल्यातले साम्य हवे तर नंतर शोधू

चमत्कार घडणे तर अत्यावश्यक आहे

पुन्हा नव्याने जुनेच जंतरमंतर शोधू

टोक कोणतेही देहाला रक्त मागते

आपण आता टोकाचे मध्यंतर शोधू

काहीही करण्यावाचुन गत्यंतर नाही

काहीही करण्यावरही गत्यंतर शोधू

जे आहे ते शोधण्यात आयुष्य संपते

युगे युगे जे नाही तेच निरंतर शोधू

जे नाही ते आहे यावर सहमत होऊ

जे आहे ते नसल्याचे प्रत्यंतर शोधू

~ राजीव मासरूळकर