गाव आता कुठी राह्यलं हाये गाव?

शह्यराच्या पलिकडं गेल्ही हाये धाव
गाव आता कुठी राह्यलं हाये गाव?

कुड कुठी दिसत नही
दिसत नही झोपडी
घरं झाले सिमीटचे
माणसं झाले खडी
माय झाली मम्मी
बाप झाला पप्पा
काळजामधी राह्यला नही
आपुलकीचा कप्पा
जिठीतिठी दिसत हाये भारी बडेजाव
गाव आता कुठी राह्यलं हाये गाव?

गावामधी ओपन झाली
येक इंग्लिस स्कुल
तव्हापसून मराठीची
बत्ती झाली गुल
पोरं लागले ईबीसीडी
म्हणायले ठेक्यात
घुसत कुठी काय व्हतं
गोंधळभरेल डोख्यात
पप्पाचा पन वाढत व्हता समाजात भाव
गाव आता कुठी राह्यलं हाये गाव?

गावामधलं बदलुन गेल्हं
सगळं वातावरन
किंमत गेल्ही शब्दाची
गढूळ राजकारन
खरी गोष्टं खोटी झाली
खोटी झाली खरी
शाह्यणे लोकंच चढू लाग्ले
कोर्टाची पाह्यरी
देवळामधल्या देवाचाबी घसरुन गेल्हा भाव
गाव आता कुठी राह्यलं हाये गाव?

जेच्यातेच्या हातामधी
आला मोबाईल
घरात बसल्या बसल्या नुस्तं
धडकू राह्यलं दिल
कोन्ही गेम खेळत बसतं
कोन्ही करतं व्हाट्सप
मनामधलं बोलणं झालं
लय लय सोपं
कोन खेळे कोन्ता तं कोन कोन्ता डाव
गाव आता कुठी राह्यलं हाये गाव?

घरोघरी गाड्या आल्ह्या
माणसं गेल्हे दूर
बरसातीले माणसासारकाच
कुठी येथो पूर?
मजुराह्यले गरज राह्यली
नही मजुरीची
शेतीवाल्या मानसायची
झाली मोठी गोची
आता कोन्त्या गावामधली गोष्ट सांगू राव?
गाव आता कुठी राह्यलं हाये गाव?

~ राजीव मासरूळकर
   दि.22/10/2017
   सायं.6:30 वाजता

दिवाळी असावी

🎇💥🌠✨🎆💥🌅✨🎇
          शुभ दीपावली

_*गरीबाघरी गोड थाळी असावी*_
_*तिथेेही सुखाची दिवाळी असावी*_

_*पिकू शेत सोन्यापरी दे विठोबा*_
_*कृपा नेहमी पावसाळी असावी*_

_*सदा कष्ट इमानदारीत करतो*_
_*मुखावर तयाच्या झळाळी असावी*_

_*वठू लागला वृक्ष दारापुढे का*_
_*घराला नको ती डहाळी असावी*_

_*मिळो कामसू धन्यता सांजवेळी*_
_*नवी प्रेरणाही सकाळी असावी*_

~ *राजीव मासरूळकर*
🌅💥🎆✨🌠💥🎇✨🎆

शुभ दिवाळी

🎆🌹🌠🌷💥🌼🎇💐🎆

चला,
दिव्याच्या वातीसारखं जळून
जगाला उजेड देऊया
फटाक्यासारखं क्षणात उध्वस्त होऊन
संपायचं नाहीय आपल्याला...
मनं, घरं, देवळं, ज्ञानमंदीरं
उजळून टाकूया सगळं काही
आपल्यातल्या चांगुलपणानं,
माणूसपणानं...!

बालगोपालांच्या मनातला
आनंद होऊया,
लक्ष्मीपूजनासह
गृहलक्ष्मीचंही पूजन करूया,
आईबहिणींच्या डोळ्यांतली
ओवाळणी होऊया...

दिवाळी करूया,
दिवाळं नव्हे......

आणि राहावतंच नसेल
फटाके फोडल्यावाचून
तर
लावून टाका एखाददोन बॉम्ब
आपल्यातल्या जातीधर्मांच्या,
गरीबश्रीमंतीच्या
धोकादायक भिंतींखाली...
बिनधास्त....

बघा, हे सगळं जमलंच तर!

आपणास शांत, तेजोमय, दुषणमुक्त, प्रदुषणमुक्त दीपोत्सवासाठी हार्दिक शुभेच्छा!

~*राजीव मासरूळकर*

🎆🌹🌠🌷🎇🌼🌠💐🎆

नि:संग

आपण करू लागलो नियमित
आपलं काम
प्रामाणिकपणानं
कि काळ बिथरतो
आणि
घोंगावत येतं कामचुकार वर्तमानाचं विस्फोटक वादळ....!
उगारले जातात खोचक प्रश्न
आपल्या सचोटीवर
आणि सार्वजनिकरित्या केलं जातं
भावना बोथट करणारं
बिभत्स चारित्र्यहनन...
तेव्हा
कापून काढावेसे वाटतात
नभापलिकडे झेपावू बघणारे
मनाचे कल्पक पंख
नको तिथे डोकावणा-या,
हवे तिकडे कानाडोळा करणा-या
या डोळ्यांमध्ये घालावेसे वाटतात टोकदार खिळे
ऐकलेल्या अफवांची तात्विक चिरफाड करणा-या
आपल्याच कच्च्या कानांच्या भिंती
लिंपाव्याश्या वाटतात
उकळत्या लाेहरसाने
सोलून काढावीशी वाटते अंगावरची ही स्पर्शातूर
चित्ताकर्षक त्वचा
छाटून टाकावेसे वाटतात
हव्यासामुळे हपापलेले
स्वत:चेच हात.... पाय.... जीभ... लिंगही...
उतरवून टाकावासा वाटतो स्वत:तला सगळा माज
ज्ञानाचा... पैशाचा... यशाचा... पदाचा.... प्रतिष्ठेचा
तोडून टाकावीशी वाटतात
स्वार्थासाठी टिकलेली भंपक नातीगोती
उधळून द्यावेसे वाटते सगळे स्थावर जंगम
किड्यामुंग्यांवरती
आणि व्हावंसं वाटतं नि:संग....
ढगामधून कोसळणा-या
दगडामधूनही पाझरणा-या
नदीमधून खळाळणा-या
स्वच्छ स्वच्छंदी पाण्यासारखं.....

पण..........
आपल्या या शांत निर्मळ पाण्यात
माणसं
स्वत:ची पापं धुणारच नाहीत
याचा काय नेम?

~ राजीव मासरूळकर
    सावंगी, औरंगाबाद
    दि.12/10/17 09:45 pm

तरही गझल: कोरडी भाकरी मिळाल्यावर

ओळ सौजन्य:-  डॉ.कैलास सोमनाथ गायकवाड

ओल धावे जिभेकडे भर भर
(कोरडी भाकरी मिळाल्यावर)

एक विश्वास आसरा देतो
एक अफवा करू बघे बेघर

मीच आलो इथे न पहिल्यांदा
काटलेले कुणी किती चक्कर!

फक्त स्पर्धा इथे सुरू आहे
कोण दिसते कुणाहुनी सुंदर

आत फुलपाखरू कसे आले?
शिंपले अंतरी कुणी अत्तर?

~ राजीव मासरूळकर
   दि.30/09/2017
   विजयादशमी 1:00am

दिखावा चालला आहे

सुखादु:खात आनंदी म्हणे जगणे कला आहे
किती जगतो खरे आपण? दिखावा चालला आहे

तुझ्यामाझ्यावरी आहे नजर बारीक सगळ्यांची
जणू त्यांना तुझामाझा सुगावा लागला आहे

उबळ वातावरण पाहून येते माणसाला का?
जुना छातीत दडलेला कितीसा खोकला आहे?

तमा आहे कुठे कोणास कोणाच्या मनाची, पण
तमा हातात कोणाच्या कुणाचा दाखला आहे...

बरा होतो दगड निश्चिंत रस्त्याच्या कडेला मी
कुणी देवा मला शेंदूर नाहक फासला आहे?

~ राजीव मासरूळकर

काय असे घडते, बाप्पा?

बाप्पा....

केवळ दहा दिवस आल्याने काय असे घडते बाप्पा?
किती जनांची भक्ती माणुसकीवरती जडते बाप्पा?

तुझे भक्त बघ कसे नाचती डीजेवर ढोसुन दारू
दरवर्षी हे बघत राहणे तुज का आवडते बाप्पा?

तुझ्याच नावे जमा वर्गणी खिशात जाते कुण्या कुण्या
जुगार, भ्रष्टाचार, प्रदूषण तुझ्यामुळे नडते, बाप्पा!

तू असल्यावरसुद्धा येथे जातधर्म तरतात कसे?
बलात्कार, हिंसाचाराने काळिज फडफडते, बाप्पा !

येताना पाऊस आणता आला तर बघ दरवेळी
तुझे आगमन शेतक-याच्या पथ्यावर पडते, बाप्पा!

दहा दिवस तू रहा मजेने... शीला, मुन्नी, झिंगाट हो
तू गेल्यावर इथे कुणाचे काही का अडते, बाप्पा?

~राजीव मासरूळकर
   25/08/2017 10:00 pm
   सावंगी, औरंगाबाद