चोळी

कित्येक दिवस झाले लिहिल्या न चार ओळी
भरली नसेल माझी अनुभवविहीन झोळी

येते सुजाण माझ्या स्वप्नात लोकशाही
नेता नसेल खोटा... जनता नसेल भोळी

शिकलो... पगार, पत्नी आहे मुले सुखी... पण
फसलो, जणू फसावा जाळ्यात आप्त कोळी

प्रल्हाद कोण आहे...? सारे हिरण्यकश्यप!
सांगा कुणाकुणाची करणार आज होळी?

शहरामधील सगळे रस्ते उदास दिसती
हसते किती निखळ ती गावामधील बोळी

राहू शकेल कोणी एकेकटा सुखाने
फिरवून चार माथे बनवा नवीन टोळी

कर्ता पुरूष येथे दारू पिऊन मरतो
कंबर कसून बाई जगते विकून मोळी

कसला विकास आहे? होतेय नग्न पृथ्वी...
झाकेल लाज ऐसी आणू कुठून चोळी?

~ राजीव मासरूळकर
   दि.15/07/2017
   09:30 pm