झोपा आता.....
थकले विटले असाल दिनभर, झोपा आता
ओढून घ्या दु:खाची चादर, झोपा आता
रातपावले भूरळ घालती भरबाजारी
आयुष्यच बाजारू खेटर.... झोपा आता!
स्वप्नांचा धुरळा झालेला बघता दिवसा
सुख स्वप्नांचे भोगा मनभर, झोपा आता!
यंत्रालाही हवीच थोडीशी विश्रांती
यंत्र न होतो तोच खरा नर, झोपा आता!
आभाळाला लख्ख लगडल्या लाख चांदण्या
एक चांदणी तुम्हास सादर.... झोपा आता!
मरमर मरमर मरता फिरता कितीक वाटा..
मरणे अंती एक धरोहर.... झोपा आता!!
~राजीव मासरूळकर
No comments:
Post a Comment