गड्या उद्याची करशील तजवीज ?
सुखात रूजते नाशाचे बीज !
भुक्या न देता धन साठवले
सुखादुःखातही ते न आठवले
येई वारसां खाता माज
सुखात रूजते नाशाचे बीज !
विद्वानाने उचलून वीडा
सुरवंटाची शमविली पीडा
हीच धरायुची खरी झीज
सुखात रूजते नाशाचे बीज !
गतिमांद्य दे गणक संगणक
यंत्र तंत्र शैथिल्य शारीरिक
समजून घे तू घामाचे चीज
सुखात रूजते नाशाचे बीज !
दुःख जन्म दे सत्कार्याला
दुःखच नेते समानुभूला
सुखलोलूप दे सोडून लाज
सुखात रूजते नाशाचे बीज !
सदा होतसे शक्तीचा जय
कष्टातून हो शक्तीचा उदय
सुखास जाळो दुःखाची वीज
सुखात रूजते नाशाचे बीज !
- राजीव मासरूळकर
No comments:
Post a Comment