सांगावा गोठून गेला
का मोरपिसांच्या ओठी?
वाळूतून उसळे पाणी
त्या डोह आटल्या राती!
कोसळली अंधारावर
वाऱ्याची अजस्र लाट
बेभानल्या दिशाही अन्
थरथरली राकट वाट
क्रोधाचे उठले मेघ
म्यानीतून काढीत वीज
अवसानघातकी वेडे
टरटरून उठले बीज
सरसरून आले काटे
अंधारमाखल्या देही
भेसूर भुंकती भूते
बेभान दिशांनी दाही
तरी रसरसलेल्या तुझिया
ओठांतून फुटले मंत्र
दवबिंदूंनी थरथरले
गवताचे गात्र न गात्र
सांगावा परतून आला
त्या मोरपिसांच्या ओठी
वाऱ्याला सुटला गंध
हळूवार पेटल्या वाती !
- राजीव मासरूळकर
No comments:
Post a Comment