कविता आहे एक रसायन !
सुखदुःखाचे आवेशाचे
मानवतेचे करी नित पुजन
कविता आहे एक रसायन !
जीवन जेव्हा पडते झडते
रडते अन् एकाकी पडते
तेव्हा हो कवितेचे सृजन
कविता असले एक रसायन !
कळितून जेव्हा फूल उमलते
भ्रमर तयाभोती भिरभिरते
कविता येते मरंद होऊन
कविता बनते एक रसायन !
मेघ बावरे मनास व्यापून
आभाळाला आणते दाटून
कविता छेडे मल्हारी धून
कविता असले अजब रसायन !
रूग्णाला ये वैद्याचा गुण
कुणी न फेडे आईचे ऋण
अशी कविता अशीच झिरपण
कविता स्त्रवते तेच रसायन !
स्वातंत्र्याची हो गळचेपी
अधिकारी गोचीड रक्तपी
कविता करते रणआक्रंदण
कविता असली एक रसायन !
मानवतेने करी प्रशासन
प्रेमाचे तिज पुरे प्रलोभन
कविता ऑक्सिजन हायड्रोजन
कविता आहे एक रसायन !
- राजीव मासरूळकर
No comments:
Post a Comment