आत्ममग्न काठ

मी
एक आत्ममग्न काठ
गहिवरून आलेल्या तळ्याच्या
अनावृत्त लाटेत
क्षणभर भिजणारा,
प्रवासी पक्ष्यांचे थवे
परत गेल्यावर
आठवणींच्या आगीत
विझणारा,
पहाडाची छाती असूनही
हवेच्या हळव्या झुळूकेत
कणाकणाने
झिजणारा,
पावसाळलेली पायवाट लेवून
काटेरी फुलांना कुरवाळत
कोरड पडलेल्या मनातच
थिजणारा . . . . . . . . . !

मी
एक आत्ममग्न काठ
श्वासांतून उसळणारे
हुंकार
कुंपणातच डांबून
अपरिहार्य त्सुनामीची
वाट बघत
स्वप्नवत आभासांत
रिझणारा . . . . . . . . . . !

- राजीव मासरूळकर
मासरूळ ता जि बुलडाणा
दि २८.७.१२
सायं ६.००वाजता