गुणगुणावे गीत आणिक
खळखळावे हास्यही
थंड व्हावा क्रोध माझा
अन् जळावे दास्यही !
चूल माझी चूक माझी,
दुःख माझे भूक माझी
काम, मत्सर, द्वेष जावा
अन् गळो आलस्यही !
तृप्ततेची हाव, स्वार्थ,
लोभही सारा जळो
प्रौढपण यौवन ठरावे,
सळसळावे बाल्यही !
भय नको मज कोणतेही
ना हो सीमा उंबरा
कर्म आधी मी करावे
मग करावे भाष्यही !
चाचरावी जीभ माझी
मागण्या कोणास काही
हात मागे ना सरावा
कुणि मागता सर्वस्वही !
- राजीव मासरूळकर
rajivmasrulkar@gmail.com
No comments:
Post a Comment