साले

2012 मध्ये गांधी घराण्याच्या (सरकारी) जावयाच्या भ्रष्टाचार प्रकरणानंतर सुचलेली ही कविता शेतक-यांना 'साले' म्हणणा-या दानवेंनाही तितकीच लागू पडते.......


करी राजकारण , मनी मोह ल्याले
लकी ड्रॉ , लिलावावरी देश चाले !

लवे , हात जोडे , बसे वाकळीवर
बघा ते खजीना लुटायास आले !

मते मोजुनी जे खिसा ओतताती
कळो ते जगाला विकाया निघाले !

समाजाप्रती ना कुणा काज चिंंता
खरे कार्यकर्ते तळाशी बुडाले !

खिळे नोकरांना विळे पामरांना
सग्यासोयऱ्‍यांना मिळे लांब भाले !

नको खंत राजीव मांडू विरोधी
तुला देशद्रोही ठरवतील साले !

- राजीव मासरूळकर
7.10.2012, 9.55PM
rajivmasrulkar@gmail.com