सांग...

सांग . . . . .

वाळवंटी पायखुणा अजूनही पाहतेस
प्रेमाचे हे विरही क्षण सांग कशी साहतेस ?

पहाटेचे उन जसे फुलला तुझा चेहरा
बोलावून बाहेर मला देते तुझा शहारा
सांग माझ्या शहाऱ्‍यांत तू कशी दाहतेस ?

मेघांतून बरसतेस तू थेंब होऊन
तन मन चुंबून तुझ्या आठवणींत नेतेस वाहून
आठवांच्या सरीत माझ्या तू कशी नाहतेस ?

संध्याकाळच्या हवेतून होतात तुझेच भास
रातराणी सुगंधातून येतात तुझेच श्वास
सांग माझ्या श्वासांविना तू कशी राहतेस ?

किती दिवस आता असे दुरून दुरून पहाणे
कुणकुण ऐकून होईल जुने वारे शहाणे
सांग कधी वाऱ्‍यासारखी माझ्या मिठीत येतेस ?

- राजीव मासरूळकर
मासरूळ , बुलडाणा