चिरंतन

काय माझे नाव आणिक कोणता हा गाव आहे ?
कोठल्या रे स्थानकाते ही अनामिक धाव आहे ?

कोणता अमरत्वदायी मंत्र माझे श्वास जपती ?
सागराच्या मध्यभागी की उलटली नाव आहे ?

रोज माझे भिष्मशब्दच उर्मटांचे भक्ष्य होती
षंढ शीखंडीच येथे जिंकतो का डाव आहे?

चंद्रकोरीची प्रभाही का बळी जाते तमाला
चोर येथे जो खरोखर, तोच इथला राव आहे !

कापडांना, कागदांना बेहिशेबी भाव येथे
माणसाची भावना अन् वेदना बेभाव आहे !

नंददीपाच्या जिभेला सुक्ष्म काळी चीर गेली
तीच माझ्या मर्मस्थानीचा चिरंतन घाव आहे !

- राजीव मासरूळकर