तू दिसल्यावर मला न सुचते काही... गीत

 तू दिसल्यावर मला न सुचते काही

     तू दिसल्यावर....!
तू दिसल्यावर मलाच भुलते मीही
     तू दिसल्यावर....! ।।धृ।।

फुलास लाजवणारा सुंदर चेहरा हसरा

     पूर्ण गझल तू, मी शेरातील एकच मिसरा
     वाह.. वाह ही दाद निघाली शाही

     तू दिसल्यावर.....!!!1!!

पहिला पाउस भिजवुन जावा तशीच भिजले

   वसंतातला पळस फुलावा तशी बहरले
   तुला टिपुन घेण्याची नयनी घाई... 

   तू दिसल्यावर ...! !!2!!

तुझ्या रेशमी डोळ्यांमध्ये भविष्य दिसले

   अता न वाटे काही कोणी असले नसले
   तुझ्याकडे वळतात दिशाही दाही.... 

   तू दिसल्यावर! !!3!!

सांग कधी तू भेटायाला येतो आहे

    हात कधी तू माझा हाती घेतो आहे
    मनही माझे मला जुमानत नाही... 

    तू दिसल्यावर!!! 4!!

दे चल हाती हात, साथ कायमची
   काळजात प्रज्ज्वलित असो फुलवात सुखाची

   परस्परांना देऊया प्रेमाची ग्वाही... 

   आज खरोखर!!! 5!!

~ राजीव मासरूळकर
   सिल्लोड, जि.औरंगाबाद
   दि.25/4/2015
   रात्री 11:30 वाजता