गाव

कुठे कुडाच्या पोकळ भिंती
कुठे विटांवर ढवळी माती
कुठे छतांवर करडे पाचट
कुठे बडे घर वासे पोचट !

उंबरठ्यावर उभा कुणाच्या
गळफासाचा जुनाच दोर
तरी पंगाड्या शौकीनांच्या
व्याख्यानांना चढतो जोर !

रणरणत्या उन्हात, धसांच्या -
शेती कुणाची पदरं भिजती
पिंपळपारांवरी विड्यांचा
गर्द धूर घेतो विश्रांती !

वक्तृत्वाच्या दाढीवाले
बोकडबुवा यांचे नेते
मेंढरमानी चालत जाती
"नियती", म्हणती, "तिकडे नेते."

साधुत्वाच्या राखेखाली
कुठे धगधगे तृष्ण निखारा
कित्येकांचे पोट रिकामे
मंदीरांचा भरे गाभारा !

कुठे असे अन् कुठे तसे पण
दिसे जरासे जे आपलेपण
दगडालाही घाम फोडते
असले माझ्या गावचे जीवन !

- राजीव मासरूळकर
"मनातल्या पाखरांनो"
rajivmasrulkar@gmail.com