ढग आलंय भरून

मन शिराळ करून
ढग आलंय भरून

हवा घुमली घुमली
धूळ नभास भिडली
त्यात वीज कडाडली
कळ पोटात उठली
कुस मायची होऊन
ढग आलंय भरून

काळवंडलं आभाळ
जणु राखंखाली जाळ
पिलं घरात घायाळ
बाप शोधतो कपाळ
डोळ्यापुढं अंधारून
ढग आलंय भरून

येई कुडातून वारं
भरे घराले कापरं
मनी हंबर हंबर
धाव धाव मुरलीधर
मन कोरडं करून
ढग आलंय भरून

थेंब आले बोरावानी
गंध भरारला रानी
वारं मोहरलं मनी
झाडं झाली पानी पानी
गेली तहान हरून
ढग आलंय भरून

गार झालं तन मन
पोरं नाचली हासून
कोंब आले टरारून
माती गेली शहारून
नाळ जन्माची धरून
ढग आलंय भरून...

ढग आलंय भरून...
ढग आलंय भरून.....!

~ राजीव मासरूळकर
मासरूळ, दि.9/5/15
सायं.7:30 वाजता