कसे आहात, मित्रांनो?

कसे आहात, मित्रांनो ?

जरा बोला, मने खोला, कसे आहात, मित्रांनो ?
असे मी ही, असा तुम्हीहि आनंदात, मित्रांनो !

कुणाला पाय नाही, कान, डोळा, कामही नाही
बघा देताच आला तर तयांना हात, मित्रांनो !

कळीचे फूल अन् निर्माल्य होते ना फुलाचेही ?
जिथे संयम, तिथे वर्षावतो परिजात, मित्रांनो !

दिव्यावर घालता प्रेमळ जरी तुम्ही हळू फुंकर
दिसे अंधार, तेथे पेटवावी वात, मित्रांनो !

बघा विश्वात लाखो तारका, तारे कसे जगती
तसे राहू, न व्हावा घात वा अपघात, मित्रांनो !

~ राजीव मासरूळकर