येणा-याचे स्वागत आहे

येणा-याचे स्वागत आहे

युगे संपली, वर्षे गेली, काळ क्षणांना चाटत आहे
जाणा-याने खुशाल जावे, येणा-याचे स्वागत आहे

तुजसोबत मी आलो इथवर, वादळास छातीवर झेलत
अर्ध्यावर तुज कसे म्हणवते, दिशाहीन हे गलबत आहे ?

धन, सौंदर्याच्या न यशाच्या नशेत जो झिंगला कधीही
थेंब थेंब दरदिवशी अमृत त्यास मिळावे, वाटत आहे

कुणी ठरवले तुझे न् माझे नाते अचूक माहित नाही
लाकुडतोड्या असेल तो; पण लाकुड मी, तू करवत आहे

किती सुखावत जपतो आपण जन्मापासुन स्वप्ने सगळी
सरताना कळते इतके की जगणे म्हणजे फसगत आहे

- राजीव मासरूळकर
दि. 31/12/2013